عمر بتانے میں فراڈ، بھارتی انڈر 19 کرکٹر آسٹریلیا کے دورے سے باہر

بھارت کی انڈر 19 کرکٹ ٹیم کے لیگ اسپنر روہت یادیو کو آسٹریلیا کے خلاف آئندہ سیریز سے دستبردار کر دیا گیا ہے، جبکہ بھارتی کرکٹ کنٹرول بورڈ (بی سی سی آئی) نے عمر سے متعلق دستاویزات میں تضاد سامنے آنے کے بعد انہیں دو سال کے لیے ڈومیسٹک کرکٹ سے معطل کر دیا ہے۔ بنگال سے تعلق رکھنے والے روہت یادیو کو آسٹریلیا کی انڈر 19 ٹیم کے خلاف بھارت کی ون ڈے اور ملٹی ڈے سیریز کے لیے منتخب کیا گیا تھا، تاہم دستاویزات کی جانچ کے دوران ان کی عمر سے متعلق معلومات میں فرق سامنے آیا۔ اس کے بعد جونیئر کرکٹ کمیٹی نے دونوں اسکواڈز سے ان کا نام نکال دیا۔ روہت کی جگہ ون ڈے اسکواڈ میں سوراشٹرا کرکٹ ایسوسی ایشن کے آریان ساوسانی کو شامل کیا گیا ہے، جبکہ ملٹی ڈے اسکواڈ میں ہریانہ کرکٹ ایسوسی ایشن کے تنمے بالودا کو موقع دیا گیا ہے۔ روہت حال ہی میں جولائی میں بھارت کی انڈر 19 ٹیم کے ساتھ سری لنکا کے دورے پر بھی گئے تھے۔ انہوں نے اس دورے میں چھ وکٹیں حاصل کی تھیں اور اس ٹیم کا حصہ تھے جس نے آخری ٹیسٹ میچ بھی جیتا تھا۔ اس کارکردگی کے بعد انہیں آسٹریلیا انڈر 19 کے خلاف بھارت میں ہونے والے میچز کے لیے منتخب کیا گیا تھا۔ تاہم سری لنکا کے دورے کے دوران ان کی دستاویزات کی جانچ میں عمر سے متعلق مسائل سامنے آئے۔ دستیاب معلومات کے مطابق روہت کے نام پر تین مختلف پیدائش کے سرٹیفکیٹس موجود ہیں، جن میں پیدائش کے سال 2007، 2009 اور 2010 درج ہیں۔ ان کے آدھار ریکارڈ میں بھی مختلف سال درج ہونے کی بات سامنے آئی ہے۔ کرکٹ ایسوسی ایشن آف بنگال میں رجسٹریشن کے وقت روہت کی پیدائش کا سال 2007 درج کیا گیا تھا۔ اس کے بعد 2017 اور 2020 میں آدھار ریکارڈ میں پیدائش کا سال 2006 کیا گیا، جبکہ 2021 میں اسے دوبارہ تبدیل کرکے 2009 کر دیا گیا۔ کرکٹ ایسوسی ایشن آف بنگال نے ان ریکارڈز میں تضاد کی وجہ سے پہلے ہی روہت کو اپنی جونیئر ٹیموں میں شامل نہیں کیا تھا اور بعد میں اس معاملے سے بی سی سی آئی کو بھی آگاہ کیا۔ بی سی سی آئی نے اب دو سالہ پابندی عائد کرتے ہوئے اس فیصلے سے اپنی تمام متعلقہ ریاستی کرکٹ ایسوسی ایشنز کو آگاہ کر دیا ہے۔ روہت کی جگہ دونوں فارمیٹس میں الگ الگ کھلاڑیوں کو شامل کیا گیا ہے۔ ون ڈے ٹیم کی قیادت لکشیا رائےچندانی کریں گے، جبکہ یش وردھن چوہان نائب کپتان ہوں گے۔ اس اسکواڈ میں سابق بھارتی اسٹارز وریندر سہواگ اور راہول ڈریوڈ کے بیٹے آریاویر سہواگ اور انوے ڈریوڈ بھی شامل ہیں۔ ملٹی ڈے ٹیم کی کپتانی یش وردھن چوہان کریں گے، جہاں روہت کی جگہ تنمے بالودا کو شامل کیا گیا ہے۔ روہت کے خلاف کارروائی ایسے وقت میں سامنے آئی ہے جب کرکٹ ایسوسی ایشن آف بنگال نے جونیئر کرکٹ میں عمر اور دستاویزات کی جانچ سخت کر دی ہے۔ ایسوسی ایشن نے 27-2026 اور 28-2027 کے سیزنز میں کسی بھی ٹورنامنٹ کے لیے رجسٹریشن یا منتقلی کے حوالے سے 62 کھلاڑیوں کو نااہل قرار دیا ہے۔ اس فہرست میں بھارت کی 2022 انڈر 19 ورلڈ کپ فاتح ٹیم کے رکن روی کمار اور بائیں ہاتھ کے اسپن آل راؤنڈر وشال بھٹی بھی شامل ہیں۔ روی کمار کے عمر سے متعلق ریکارڈز میں 45 ماہ کا فرق سامنے آنے کی اطلاع ہے، جبکہ دیگر جونیئر کھلاڑیوں کی دستاویزات میں بھی کئی سال تک کے نمایاں اختلافات پائے گئے ہیں۔

Read full story on Aaj