سعودی دفاع کے لیے پاکستان کسی بھی حد تک جائے گا، ڈی جی آئی ایس پی آر

ڈی جی آئی ایس پی آر لیفٹیننٹ جنرل احمد شریف چوہدری نے کہا ہے کہ پاکستان سعودی عرب کے دفاع کے لیے کسی بھی حد تک جائے گا، سعودی سکیورٹی کے لیے ہمارا عزم غیرمشروط ہے اور حرمین شریفین کے تحفظ کے لیے پاکستان وہاں موجود ہے۔ عرب نیوز کو خصوصی انٹرویو میں لیفٹیننٹ جنرل احمد شریف چوہدری نے کہا کہ پاکستان ہر قسم کی جارحیت کے خلاف سعودی عرب کا دفاع کرتا رہے گا، مکہ اور مدینہ منورہ کے تحفظ کے لیے پاکستان کے عزم میں کوئی ابہام نہیں ہونا چاہیے۔ انہوں نے کہا کہ پاکستان سعودی عرب کے ساتھ مکمل طور پر کھڑا ہے، دونوں ممالک کے عوام، سیاسی قیادت اور افواج کے درمیان تاریخی اور ناقابلِ ٹوٹ رشتہ قائم ہے، پاکستان سعودی عرب کے ساتھ کیے گئے وعدوں پر قائم ہے۔ ڈی جی آئی ایس پی آر نے کہا کہ سعودی سکیورٹی کے لیے پاکستان کا عزم غیرمشروط ہے، حرمین شریفین کی حفاظت کے لیے ہم وہاں موجود ہیں، اس میں کسی قسم کا کوئی شک نہیں ہونا چاہیے۔ انہوں نے کہا کہ 7 اگست کو پاکستان، سعودی عرب اور ترکیہ کے درمیان مکہ جوائنٹ ڈیفنس معاہدہ طے پایا، جس کے تحت تینوں ممالک میں سے کسی ایک پر مسلح حملہ تینوں پر حملہ تصور ہوگا۔ معاہدے میں تینوں ممالک کے درمیان دفاعی تعاون مزید بڑھانے کا بھی عزم کیا گیا ہے۔ لیفٹیننٹ جنرل احمد شریف چوہدری کا کہنا تھا کہ کسی بھی حملے کی صورت میں تینوں ممالک باہمی مشاورت سے لائحہ عمل طے کریں گے اور اسی کے مطابق عمل کیا جائے گا۔ انہوں نے کہا کہ موجودہ علاقائی کشیدگی کے دوران پاکستان کی سیاسی اور عسکری قیادت سعودی قیادت کے ساتھ مسلسل رابطے میں ہے، جبکہ پاکستان بحران کے پرامن حل اور مذاکرات کے ذریعے کشیدگی کم کرنے کے لیے بھی سفارتی کوششیں جاری رکھے ہوئے ہے۔ ڈی جی آئی ایس پی آر کا یہ بیان ایسے وقت میں سامنے آیا ہے جب سعودی عرب کو حوثیوں کی جانب سے میزائل اور ڈرون حملوں کا سامنا ہے۔ عرب نیوز کے مطابق حالیہ حملوں کے تناظر میں پاکستان نے سعودی سکیورٹی کے لیے اپنے غیرمشروط عزم کا اعادہ کیا ہے۔ مکہ جوائنٹ ڈیفنس معاہدے کے سرکاری اعلامیے کے مطابق معاہدے کا مقصد تینوں ممالک کے خلاف کسی بھی جارحیت کے مقابلے میں مشترکہ دفاعی صلاحیت اور اجتماعی مزاحمت کو مضبوط بنانا ہے۔

Read full story on Aaj